Honorarium sa barangay padugangan
CEBU, Philippines - Gisugyot sa konseho sa dakbayan sa Sugbo nga parehason ang honorarium sa tanang kawani sa 80 ka barangay sa tag P10,000 matag buwan.
Kini base sa giduso nga resolusyon nila’ng Konsehal Lea Japson ug Eugenio Gabuya.
Matud ni Japson ug Gabuya nga kinahanglan nga makaangkon og uniporme nga honorarium ang mga kawani tungod kay pareho man sila nga nagserbisyo sa publiko Samtang si Mayor Michael Rama buot nga patun-an ang mao’ng sugyot tungod kay aduna pa’y mas importante ug kinahanglan nga iprayoridad sa kagamhanan sa dakbayan.
Si Rama una na’ng nipahibawo nga pun-an og P1,500 ang honorarium sa tanang kawani sa barangay atol sa State Of the City Address (SOCA) sugod sunod tuig.
Ang presidente sa Association of Barangay Councils ug kapitan sa Tisa, Phillip Zafra, nagkanayon nga dugay na unta nga gihatag ang plano nga pagpataas sa honorarium gikan sa kagamhanan sa dakbayan.
“Our co-servants in the barangay are just receiving very low honorarium despite facing an enormous task, seeing to it that basic services are attended to immediately,” matud ni Zafra.
Kasamtangang adunay P5,500 ang city nutrition scholars (CNS); P5,500 sa barangay health workers (BHW); P4,000 sa barangay tanod; P4,000 sa lupon tagapamayapa; P6,000 sa barangay day care workers; P5,000 sa barangay environmental officers; P5,000 sa barangay drivers ug loaders ug P5,000 sa GAD officer ang madawat matag buwan. (BANAT NEWS)
- Latest
