CEBU, Philippines - Ang grabing kaguol human nga nahibaw-ang sinagop lang diay siya maoy gituohang hinungdan nga nagkutlo sa iyang kinabuhi ang usa ka 21-anyos nga lalaki diha sa ilang balay sa Malbago, Daanbantayan.
Napalgan na lang nga patay si Edward Godinez, 21, giingong naghikog kini pinaagi sa pagbitik sa iyang liog gamit ang pisi nga gihikot sa ibabaw nga bahin sa ilang atop.
Mitubag si SPO4 Herminio Marinduque ug kaubanan sa maong alarma ug ilang naabtan nga gitangtangan na gikan sa gibitayan ang namatay.
Sumala pa nga nilakaw ang ginikanan sa maong lalaki pasado ala una sa hapon ug siya lang ang nahibilin.
Apan ang iyang kaliwat nga si Sedra Godinez nga iya ra pong silingan ang nakadiskitar sa maong lalaki nga naghikog sulod sa balay.
Sumala pa sa imbestigasyon sa kapolisan nga ang namatay naguol og maayo dihang nahibaw-an niyang sinagop siya duha ka bulan na ang milabay.
Matud pa nga nibuhi kini og pamahayag nga “puslan man, maghikog ko.”
Gitambagan sa kapolisan ang mga kabanay nga ipaubos sa autopsy ang patay’ng lawas ni Godinez aron masuta kun unsa ang hinungdan sa iyang kamatayon ug kun duna ba kini foul play.
Samtang usa ka 56-anyos nga biyudo ang nisuway paghikog diha sa San Antonio, barangay Linao, dakbayan sa Talisay human siya gipugos sa iyang kapuyo nga magpakasal silang duha.
Si Senior Police Officer 1 Mikie Espina ang imbestigador sa siyudad sa Talisay miingon sa Banat News nga adunay daan nga panagbangi ang managkapuyo tungod sa pakig-relasyon sa lalaki sa laing babaye.
Matud pa tungod niini, pirme kining magkalalis sa 48 anyos nga kapuyo ug duna pay higayon nga nag-abot silang duha sa Talisay City Police Station human migrabe ang ilang away.
Si Espina nagkanayon nga gihangyo sa babaye ang namatay nga magpakasal na sila apan pirmeng mobalibad ang lalaki kay edaran na sila.
“Gusto man gyud sa babaye nga maiyaha na iyang kapuyo mao nga sige ni niya og pugos nga magminyo aron mahuman ang problema nila bahin sa laing babaye,” matud pa ni SPO1 Espina sa telepono.
Matud pa samtang nangatulog ang duha, nisuway og bitik sa iyang liog ang lalaki gamit ang pisi nga gihigot niini ang pikas tumoy sa kahoy sa kisame sa ilang panimay.
Apan dihang nagkirig-kirig na ang lalaki nauyog ang balay ug natugaw hasta ang kasikbit nilang panimalay hinungdan nga nabulabog ang mga silingan ug nakamata ang iyang kapuyo.
Ila kining gitabangan pag-aswat ug giputol ang pisi ug gidala sa Talisay District Hospital. (BANAT NEWS)