Salisi gang nakabiktima na ‘sab
CEBU, Philippines - Lain na usab nga langyaw ang nabiktima sa Salisi gang human usa ka Korean ang nawagtangan og sobra sa P40 mil lakip ang kwarta ug kabtangan sud sa usa ka fast-food restaurant nga nahimutang sa mall sa barangay Luz, Cebu City niadtong nakalabay nga hapon.
Ang biktima mao si Ji Woong Chang, 39, taga Seoul, South Korea ug kasamtangang nag-abotan karon sa Shangri-la Hotel sa Lapu-Lapu City.
Atol sa gihimo nga pasiuna nga imbestigasyon, kauban ni Chang sa pagkaon ang iyang asawa mga ala 1:30 sa hapon niadtong miaging Biyernes.
Si Chang mitug-an sa mga imbistigador nga nahanaw ang bag sa asawa ni Chang nga bag-ohay ra nilang gibutang kilid sa lamesa nga ilang gikan-an apan sa paglingi nila nahanaw na kini.
Lakip sa nakuha sa kawatan mao ang Samsung Digital Camera nga tag P11,800, Apple iPad nga tag P11,800, Prada wallet nga tag P15,850 ug kwarta nga P3,964. Ang tanan mobalor ngadto sa P43,414.
Matud ni Señor nga ila pang subayon kung aduna ba’y footage sa closed-circuit television camera ang maong kan-anan aron masubay kun si kinsa ang mga kawatan.
Gisubay na karon sa mga imbestigador kun ang mga kawatan kauban ba sa grupo sa Salisi gang nga namiktima dinhi sa Metro Cebu sa nanglabay nga mga buwan, siyam kanila ang nadakpan ug nasuta nga unom kanila ang nakapiyansa ug nibalik og pamiktima sa siyudad.
Matud ni Señor nga aduna silay nadawat nga mga taho nga ang unom mibalik na pud sa mao nga krimen apan sulod na sa mga malls. Iyang gipahimangnoan ang publiko nga magbinantayon pirme bisan pa og naa sulod sa mall tungod kay bisan asa mopuntariya ang mga kawatan. (BANAT NEWS)
- Latest
