CEBU, Philippines - Patay ang usa ka ginang sa panimalay dihang nakuryentihan sa nagkawil nga livewire diha sa ilang balay sa barangay Taytay, dakbayan sa Danao kagahapon sa buntag.
Si Police Officer 3 Nelson Pantoja sa Danao Police Station miila sa nakuryentihan mao si Nora Basay Arevalo, 37 , nagpuyo sa maong dapit.
Matud pa ni Pantoja nga sayo nga nanglaba ang biktima apan sa pagpanghayhay niini nahikapan niini ang napanit nga bahin nga kuryente nga nagbitay sa gawas sa panimalay.
Dihadiha nikirig ang ginang ug nahagba sa yuta, dali siyang gitabang sa iyang bayaw nga si Ireneo Dayon ug gihatud ngadto sa Danao Provincial Hospital apan ang mga doktor sa maong tambalanan mideklarar niini nga dead on arrival.
Gitataw ni PO3 Pantoja nga mohimo pa sila og dugang imbestigasyon sa pagsuta kun nganong nagbitay man ang live wire nga nahikapan sa biktima.
“Among gitambagan ang mga tagtungod sa namatay sa pagpaubos sa autopsy sa patay’ng lawas sa biktima sa pagsuta sa hinungdan sa kamatayon niini,” sumala pa ni Pantoja. (BANAT NEWS)