CEBU, Philippines - Gihagit ni Konsehal Danilo Caballero si Talisay City Mayor Johnny V. de los Reyes nga taktakon ang iya’ng mga paryente sa City Hall kun tinuod kini'ng naluoy sa mga kabus ilabi na sa mga job order.
Kini human nipadayag si de los Reyes sa kaluoy sa mga JOs nga dili na makatrabaho gumikan sa paglaslas sa budget.
Apan ang mayor nagdumili sa pagsanong sa hagit ni Caballero tungod kay ang iya’ng mga paryente pulos naglihok sa pagtabang kaniya.
Giingong nagdawatan og tag P500 matag adlaw ang mga anak ug paryente ni de los Reyes sa City Hall.
"Ang sweldo ana nila matag adlaw maapod unta na sa duha ka job order kun iya’ng i-regulate ang iya’ng pamilya. Iyawat na lang mapalit og bugas sa mga tawo nga naglisud," matud ni Caballero.
Apan si de los Reyes nagkanayon nga kun maluoy siya ug nitabang sa ubang tawo, salikwaot sab nga dili siya makatabang sa iya’ng kaugalingong pamilya ug paryente. "Kini’ng ako’ng mga paryente naglihok intawon ni 24 oras ug dali ra nako masangpit," tubag pa sa mayor.
Sa nakuha’ng record sa Banat News, aduna'y 39 ka confidential employees si JVR ug ang 13 niini iya’ng mga paryente nga sila si Clifford de los Reyes, anak sa mayor; Jackie Lou, asawa ni Clifford; Dorcel de los Reyes, pag-umangkon; Jim de los Reyes, igsuon sa mayor; Johnny Jr., anak; Johnson Joy Pugasan, anak ni Antonette Sevilleno nga paryente sa asawa sa mayor; Richardlie de los Reyes, ug lain niya’ng anak nga si John Yre kinsa mao’y city administrator. (Gabriel C. Bonjoc/GMR)(BANAT NEWS)