Tulisan gibaharan sa mayor

CEBU, Philippines – Gibaharan ni Medellin Mayor Ricardo Ramirez ang mga tulisan nga buot motago sa mga mingaw nga lugar sa ila’ng lungsod human sa labi’ng una’ng higayun nga tulis nga nahitabo sa mga turista’ng Intsik sa barangay Curva.

“Panawagan sa mga tulisan nga naghupo-hupo ug dunay mga plano nga manulis. Ayaw ninyo buhata intawn diri sa amoang lungsod ang inyo’ng dautan plano kay kamo rasad unya mao’y magmahay.

Ayaw mo pagsalig nga amo’ng mga highway daghang lugar nga mingaw ug awa-aw,” matud ni Ramirez sa iya’ng Facebook.

Matud ni Ramirez nga mga batan-on ang mga polis sa iya’ng lungsod ug gusto og pasingot.

“Pero og gahi gyud mo’g ulo unya di mo mopatuo, aw Rock and Roll to Jail mo,” dugang ni Ramirez dungan ang bahad nga magsilingan na sila unya.

Iya’ng gipasabot ang nahimutangan sa prisohan sa Bureau of Jail Management and Penology nga anaa atbang sa iya’ng pinuy-anan.

Si Kongresista Benhur Salimbangon kinsa residente sa barangay diin nahitabo ang tulis nagpasalamat sa kapolisan sa dali’ng kasulbaran sa kaso human nasikop ang mga suspek sa tulis.

Nadakpan sa mga sakop sa Provincial Intelligence Branch ang usa ka Jelson Cando Enriquez diha’ng nakuha ang extra judicial confession gikan sa igsuon nga drayber sa gisakyan sa mga langyaw.

Ang igsuon ni Enriquez nga si Jerome ang nitug-an nga mao’y utok sa pagtulis.

Ang hepe sa PIB nga si Supt. Rodolfo Albotra niingon nga base sa reaksiyon sa drayber sa van atol sa hitabo, nagduda sila nga lagmit aduna kini’y kalambigitan sa tulis.

“Ikaw kung alihan ka og nag-motor mohunong diay dayun ka? Ang instinct sa tawo modagan gyud ka, imo’ng ligsan ang motor,” matud ni Albotra.

Nakombinsir ang suspek nga motahan ug nakuha   gikan ni Jelson ang usa ka .9mm pistol ug .45 caliber pistol nga dunay upat ka bala.

Narekober sab sa mga polis ang duha ka wigs, duha ka bonnets, duha ka helmets, holster sa pistola ug usa ka cellphone.

Si Jelson nihimakak sa pagpanulis ug proteksiyon lang niya ang nakuha nga armas.

Gawas ni Jelson gipangita sab karon sa kapolisan ang usa ka Roger nga gikataho’ng kauban ni Jelson sa pagpanulis. – /GMR) (BANAT NEWS)