Marijuana gihimo’ng masitas

CEBU, Philippines – Niabot sa 900 ka punoan sa marijuana ang gipangibot sa kapolisan sa duha ka barangay sa lungsod sa Bantayan sa sunod-sunod nga operasyon sa nakalabay nga adlaw.

Matud ni PO3 Jesus Aguisanda, desk officer sa Bantayan Police Station, nga nakadawat sila og impormasyon gikan sa usa ka concern citizen sa sitio Kalubihan, barangay Kangkaibe sa mga marijuana nga gitanum. Nakuha sa mga polis ang 22 ka punoan sa marijuana nga gikataho’ng gitanum sa usa ka 60-anyos nga biyuda nga nagtuo lang nga usa ka natural nga buwak ang iya’ng gitanum nga dunay yellow ug violet nga buwak.

Apan human nadala sa kapolisan sa ila’ng buhatan ang mga marijuana, laing tawag sa cellphone ang ila’ng nadawat nga may pipila ka residente sa barangay Sillion ang gikataho’ng nagtanum sab og marijuana.

Sa mao’ng operasyon ang hepe na mismo nga Senior Insp. Jaime Santillan ang nangulo sa pag-adto sa lugar ug ila’ng nakita ang mga marijuana nga gipangtanum sa gawas sa mga balay nga gisulod sa kaang.

“Atong Sept. 13 sa barangay Sillion daghan ta’g nakuha gitanum mura ra’g masitas display ra kaayo sa daplin sa dalan. Mamuwak man, mao to ila’ng gitanum and ila’ng purpose masitas ra gyud,” matud ni Aguisanda.

Human sa ilang opersayon sa Barangay Sillion daghan pa nga tawag ang ila’ng nadawat may labot sa nasigpatan nga mga marijuana.

Namatikdan sab sa kapolisan nga sagad sa mga nagtanum sa mga marijuana halos nag-edad na og 60-anyos pataas nga wala’y kalibutan nga ilegal ang ila’ng gihimo ug wala nakaila nga marijuana diay ang ila’ng gitanum.

Hinuon ang mao’ng mga residente ang gipaatubang sab sa buhatan sa kapolisan aron makahatag sa ila’ng tubag ug mapasabot sa ila’ng gibuhat. – /GMR) (BANAT NEWS)