CEBU, Philippines - Grabe’ng naangol ang usa ka tawo nga biktima sa pagpanunggab sa iya’ng bukobuko samtang nagtan-aw og disco sa sitio Upland, Poblacion, dakbayan sa Danao ala una pasado sa kaadlawon niadto’ng Huwebes.
Si Senior Officer 1 Rodrigo Roble sa Danao City Police Station niila sa biktima nga si Oliver Tallo, 35, nagpuyo sa mao’ng dapit.
Matud ni Roble nga nakadawat sila og pahibawo gikan sa Danao Provincial Hospital labot sa usa ka tawo nga biktima sa pagpanunggab.
Dugang niya nga diha’ng gihimo nila ang imbestigasyon ila’ng nasuta kalit lang nitumaw ang wala hiilhi’ng lalaki ug gidunggab ang bukobuko sa biktima. Human sa pagdunggab, ang wala hiilhi’ng lalaki dali usab nga nisibat pahilayo sa mao’ng dapit.
Si Roble niingon nga human sa pasiuna nga pagtambal sa biktima gibalhin kini sa Vicente Sotto Memorial Medical Center sa dakbayan sa Sugbo. (BANAT NEWS)