Pamilya sa namatay sa AIDS tabangan

CEBU, Philippines - Andam si Archbishop Jose Palma mohatag og ayuda sa pamilya sa nitaliwan nga 29-anyos nga ginang gumikan sa acquired immune-deficiency syndrome (AIDS).

Matud sa arsobispo nga ang health committee ug ang Caritas magtambayayong aron ila’ng tan-awon kung unsa’y ila’ng matabang tungod kay gipahinumdum niini’ng Year of Mercy nga angayan tabangan kung kinsa ang tabangunon.

Kini sumala usab sa pahinumdum ni Pope Francis.

Dugang sa arsobispo nga ang Archdiocese of Cebu adunay mga tigum nga gipahigayun may kalabutan sa lintunganay sa human immune-deficiency virus (HIV) sulod na sa pipila ka tuig.

Si Bise Mayor Edgardo Labella nimando sa Department of Social Welfare and Services nga kasamtangang i-kustodiya ang tulo ka mga minor de edad nga anak sa namatay diin duha niini positibo sa HIV.

Sumala pa ni Labella nga ang mga bata pangitaan og tukma nga institution nga moatiman sa ila’ng panginahanglanon.

Dugang ni Labella nga kinahanglang tinud-on paghatag og pagtagad ang problema tungod kay makaalarma ang mao’ng taho nga nagkataas ang gidaghanon sa kaso sa HIV/AIDS.

Gibutyag ni Labella nga andam mohatag og financial assistance ang kagamhanan ngadto sa pamilya sa namatay sa higayun nga masunod ang proseso sa paghatag.

Biyernes sa hapon gilubong ang 29-anyos nga batan-on nga ginang sa usa sa mga sam-ang sa dakbayan sa Sugbo.  (BANAT NEWS)