Retired Judge napaig

CEBU, Philippines - Napaig ug dili na halos maila ang lawas sa usa ka retiradong huwes human kini na-trap sa iyang gipuy-an nga nasunog kagahapon sa kaadlawon diha sa Honeyville 2, Barangay Quiot, dakbayan sa Sugbo.

Giila ang nakalas sa sunog nga si retired judge Delfin Decierdo, 77 anyos kinsa miretiro sa serbisyo niadtong tuig 2010 ug katapusan kining nadestino sa Municipal Trial Court sa lungsod sa Sibonga. Una niini, nadawat sa mga kabomberohan ang alarma sa sunog alas 4:15 kagahapon sa kaadlawon ug gideklarar nga fire under control alas 4:35.

Base sa gihimong pakisusi ni Senior Fire Officer 1 Edwin Handayan, fire investigator, napasagdang kandila maoy gidudahang hinungdan sa maong sunog.

Matud pa sa katabang sa namatay nga si Michelle Promagera, nagtuo siya nga dunay nagdukdok sa jalousy blades gumikan kay dunay buto-buto sa gawas nga bahin sa balay.

Apan dihang iyang gisusi mao na lay iyang nakita nga sunog na diay kini ug dali niyang gisangpit ang huwes apan wala na kini mobangon.

Matud pa kada gabii   magdagkot og kandila ang huwes sa atubangan sa hulagway sa iyang mitaliwan nga kapikas sa kinabuhi ug ang katabang ug pag-umangkon na niini maoy mupawong sa kandila ini og kagabii.

Gituohan nga nakamata pagkakaadlawon ang huwes ug posibleng gidagkotan niini pagbalik ang kandila nga wala na nila mabantayi.

Nasayran nga unom ka tawo ang anaa sa panimalay sa biktima dihang nahitabo ang insidente apan wala na matabang si Decierdo gumikan kay midako dayon ang kalayo.

Sumala pa makahimo pa unta sa paglakaw ang huwes apan ang pultahan sa lawak niini dali kaayong nakaon sa kalayo hinungdan nga wala na kini makagawas.

Matud ni Chief Inspector Rogelio Bongabong Jr., Cebu City Fire Marshal nga palawman pa nila ang ilang imbestigasyon.

Sulod ning buwana, duha na ka mga sunog ang nahitabo sa maong barangay, hinungdan nga si Kapitan Francis Esparis mimando og subsob nga information campaign kabahin sa fire safety sa iyang mga konstituwente. (BANAT NEWS)