CEBU, Philippines - Gidakop sa iya’ng manager ang usa ka dalaga nga volt custodian sa usa ka ilado’ng pawnshop sulod sa usa ka mall sa Apas, dakbayan sa Sugbo human nasakpan nga gipang-ilisdan og peke ang mga alahas pasado ala una sa nakalabay nga hapon.
Ang gidakop mao si Jenelyn Jube, 34, taga Ramona Village, Nonoc, Tabunok, dakbayan sa Talisay.
Ang nakasakop sa suspek mao si Erlinda Tenchavez, 52, minyo ug group manager sa RD Pawnshop.
Matud ni Wilfredo Villarojo, non-uniform police sa Mabolo Police Station, nga nadakpan si Jube human nag-imbentaryo sa mga alahas.
Sa pagsubay sa ila’ng manager, kompleto ang mga alahas apan namatikdan nga kini lahi og klase hinungdan ug nasayran nga peke ang uban ug gidudahang gipang-ilisan ni Jube.
Niabot sa 52 ka gold jewelries ang giingong gipang-ilisan og peke nga mikantidad og P150,050.
Kagahapon gipasakaan na og kaso’ng qualified theft ang dalaga nga nagtingkagol sa selda sa Mabolo Police Station. (Jojo C. Ugdol/GMR)(BANAT NEWS)