PNP chief nagpa- salamat sa Pro-7
CEBU, Philippines - Gipasalamatan sa labaw sa kapolisan sa nasud ang Police Regional Office-7 ug ubang ahensiya nga apil sa pagpatuman sa seguridad sa una’ng hugna sa Asia-Pacific Economic Cooperation (APEC) Summit sa Sugbo.
Sumala pa ni Police Director-General Ricardo Marquez nga ang Task Group-Cebu sa APEC 2015 nipakita sa pagka-epektibo sa trabaho apil na ang pagplano ug pagpatuman sa seguridad sa daku’ng kalihukan.
Matud ni Marquez nga nakuha gyud sa kapolisan ang ila’ng target nga “zero casualty” ug wala’y dagku’ng panghitabo nga naglambigit sa APEC.
Si Marquez nibisita sa buhatan sa PRO-7 niadto’ng Huwebes ug nihatag og pasidungog sa mga sub-groups sa Site Task Group-Cebu sa APEC ug sa mga sakop sa kapolisan gitunol ang PNP Efficiency Medal o Medalya ng Kasanayan.
Ang direktor sa PRO-7, Chief Supt. Prudencio “Tom” Bañas, gihatagan sab og Medalya ng Pambihirang Paglilingkod isip nangulo sa Site Task Group-Cebu, National Joint Task Force APEC 2015.
Tanang commanders sa nagkadaiyang yunit ang apil sab nga gihatagan og pasidungog.
Human sa una’ng hugna sa APEC gipangandaman na sab sa kapolisan ang ikaduhang hugna nga sa gihapon himuon sa Sugbo. (Jojo C. Ugdol/GMR)(BANAT NEWS)
- Latest
