CEBU, Philippines - Pangulo sa Department of Health-7 Dr. Jaime Bernadas mibutyag nga ikaduha ang rehiyon sa adunay labing daghan nga kaso sa Human Immunodeficiency Virus (HIV) sa tibuok nasud.
Sumala pa ni Bernadas, dunay mga programa nga gipahigayon ang DOH-7 may kalabutan sa HIV ug Acquired Immune Deficiency Syndrome (AIDS) apan daghan gihapon ang natakboyan niini tungod sa pagpasagad.
Matud pa niya, ang dakbayan sa Sugbo maoy nag-una sa tibuok nasud sa kinadaghanan og injectable drug users.
Base sa talaan sa DOH sukad niadtong tuig 1984 hangtod karong tuiga miabot na og 26, 456 ka kaso sa HIV-AIDS ang ilang natala ug 24,169 niini mga asymptomatic cases ug 2, 287 ang full-blown AIDS.
Sa Central Visayas, 2, 359 ang natalang mga kaso sa HIV-AIDS apan ang 2,150 niini naggikan tanan dinhi sa Cebu City. Gisundan sa Bohol-70, Negros Oriental-47 ug Siquijor-2.
Nasuta usab nga mas daghan sa mga nasakit niini mga lalaki nga niabot og 2,121, samtang ang babaye, 237, nasuta usab sa pagtuon nga nagkadaghan sa mga natakboyan mao kadtong nakighilawas sa kaparehong lalaki nga walay mga proteksyon ug ang mga injectable drug users.
Ang DOH-7 mosusi karon sa migawas nga report sa Banat News nga dunay 29-anyos nga inahan nga namatay sa AIDS dinhi sa dakbayan.
Kagahapong adlawa gilubong na ang patay’ng lawas sa maong ginang sa usa ka publikong sam-ang ug gihatud kini sa iyang pamilya, mga anak ug kahigalaan.
Matud pa ni Bernadas paspas kaayo ang pagsaka sa gidaghanon sa mga natakboyan sa maong sakit dinhi sa Sugbo ug buot nilang matabangan kadtong mga anaa na niini apan mahadlok o mauwaw pagduol sa ilang buhatan.
Usa sa pamaagi sa DOH pagtabang kanila mao ang information education, counseling, regular checkup ug voluntary testing nga libre.
Nasayran nga ang budget alang sa kampanya batok sa HIV-AIDS gipadak-an sulod na sa tulo ka tuig.
Naabtan sa Banat News ang usa ka 23 anyos nga babaye nga tuyong miadto sa DOH-7 kagahapon aron boluntaryong mopaubos og HIV testing.
Matud pa niya importante nga mopaubos siya niini ilabi na nga ang iyang trabaho anaa sa medical field nga risgo kaayo tungod kay matag karon unya nag-atiman sila og mga pasyente. (Decemay P. Padilla ug Rowena Capistrano/EIM)(BANAT NEWS)