CEBU, Philippines - Mokabat P1 milyon nga kantidad sa medical equipment ang gidonar sa sister city sa dakbayan sa Sugbo, ang Haarlemmermeer City sa nasud sa Netherlands alang sa Cebu City Medical Center (CCMC).
Kini human nga nahibaw ang kagamhanan sa Haarlemmermeer sa nahitabo sa maong tambalanan dihang lakip kini sa naapektohan sa linog niadtong tuig 2013.
Ang Vriendschapsband Haarlemmermeer Cebu ang nidonar og kwarta alang sa maong medical equipment nga naglakip sa 27 ka mga hospital beds lakip niini ang mattress, bedside table ug IV stands.
Nagkantidad og P60 mil ang matag set niini ug sa pagkakaron 15 pa ka mga higdaanan ang anaa diha na sa CCMC ug 12 pa ka buok ang gikatakda nga moabot.
Kagahapong adlawa gipahigayon ang turnover sa maong mga medical equipment inubanan sa mga board member gikan sa Haarlemmermeer lakip ni Peter Janssen, Jan Willem Ittmann ug Stephan Elst.
Matud ni Janssen nga nibisita siya sa nasud 10 ka adlaw human ang bagyong Yolanda niadtong 2013 aron mangita og unsa'y ikatabang sa ilang kagamhanan sa ilang lungsod didto sa Netherlands.
Samtang si Cebu City Councilor Alvin Dizon nitambong usab sa maong kalihokan kagahapon sa CCMC. (BANAT NEWS)