CEBU, Philippines - Dul-an P6 milyones nga kantidad sa mga marijuana ang nasakmit sa hiniusang operasyon sa Philippine Drugs Enforcement Agency-7, 5th Special Force Company sa Philippine Army, Intelligence Service Unit-7 ug Regional Criminal Investigation and Detection Unit diha sa Sitio Law-ang, Brgy. Basiao lungsod sa Badian pasado alas 2 sa nakalabay nga kaadlawon.
Atol sa operasyon nadakpan sa mga operatiba si Ryan Dionaldo, 30, nagpuyo sa maong dapit nga giingong maoy nagtanom niini.
Ang direktor sa PDEA-7 nga si Jeffrey Bangsa miingon nga miabot sa 26, 958 ka mga dagkong punoan sa marijuana ug 1,200 ka semilya niini ang ilang gipanglarot.
Kini gitanom sa 13, 200 square meters nga luna didto sa maong dapit.
Base sa pagbanabana sa Dangerous Drugs Board mokabat sa P5.9 million ang kantidad sa mga nasakmit nga mga marijuana.
Apan ang dinakpan nga si Dionaldo nga nahinabi sa Banat News sulod sa selda sa PDEA-7 hugtanong mihimakak sa pasangil kay matud niya drayber lang siya og habal-habal ug wala siya masayod sa maong mga marijuana.
Matud niya natingala na lang kini kay giadto siya sa ilang balay ug gidakop human wala niya tultoli ang mga otoridad sa gitamnan sa mga marijuana.
Miangkon hinuon siyang nakaila siya kinsay nananom niini nga matud niya usa ka grupo ug nagpuyo sa ibabaw nga bahin diin mahimutang ang plantasyon. (BANAT NEWS)