Kapolisan sa Minglanilla gipasidunggan
CEBU, Philippines – Gipasidunggan sa Cebu Police Provincial Office ang kapolisan sa lungsod sa Minglanilla human sa dali nga kasulbaran sa kaso’ng pagpatay sa inahan ug anak nga sila si Virginia Sharpe, 37, ug anak nga si Mica Ella, 11-anyos. Ang hepe sa Minglanilla Police Station nga si Chief Insp. Richard Gadingan ang nidawat sa pasidungog sa CPPO sa niaging adlaw.
Ang mga polis nga gitagaan sa pasidungog mao sila si SPO2 Oliver Dacua, SPO1 Renato Masangcay, SPO1 Romeo Barde, PO2 Evelino Selloria, PO2 Arnel Resente ug PO2 Mary Christie Nacario.
Si Gadingan nga nahinabi sa Banat News niingon nga nidayeg sa iya’ng mga sakop nga wala nihunong sa pagpangita sa mga testigos ug ebidensya aron mataral sa hukmanan ang mga suspetsado.
Nagtuo sab si Gadingan nga uban sa tabang sa Ginoo ila gyud nailhan ug nadakpan sa dali nga panahon ang mga suspetsado.
Si Virginia ug Mica Ella nakit-an na lang ilawom sa septic tank sa ila’ng balay nga nanimaho na human giingong brutal nga gipatay sa mga suspek nga sila si Manuel Labrador, Espelito Ricamora ug George Baquiran nga mga panday sa panimalay sa mga biktima. – /GMR) (BANAT NEWS)
- Latest
