Tulo ka kawani sa Catmon ‘adik’

CEBU, Philippines – Tulo ka kawani sa munisipyo sa lungsod sa Catmon ang positibo sa paggamit og ginadiling drugas human sa gipahigayong drug test niadtong Lunes sa buntag.

Apan ang maong resulta ipaubos pa kini sa confirmatory test matud ni Batche Lintag sa Cebu Provincial Anti-Drug Abuse Council (CPADAC).

Si Lintag mibutyag nga 150 ka kawani sa munisipyo lakip na niini ang mga polis ang target sa maong drug test.

Apan 147 lang ang nipaubos niini tungod kay ang ubang mga polis nadestino man sa Asia-Pacific Economic Cooperation Summit (APEC). Hinuon walay nagpositibo sa mga polis nga napaubos sa drug test.

Lakip sa nagpaubos sa drug test ang mayor, bise mayor ug mga konsehal sa lungsod.

Matud ni Lintag nga si Mayor Dan Jusay maoy mihangyo nga ipaubos sila sa drug test kini subay usab sa programa sa Kapitolyo batok sa ginadiling drugas  ug “drug free work place.”

Ang maong drug test gipahigayon diha sa gym sa lungsod pagkahuman sa ilang flag raising.

Sa laing bahin, sukad niadtong Marso 31, 2014 hangtud sa Septiyembre 7, 2015 mikabat sa 1,817 ka mga kawani sa 22 ka lungsod ug siyudad ang napaubos  sa drug test.

Sa maong gidaghanon sa mga kawani 60 niini ang positibo sa paggamit og ginadiling drugas.

Gikan gihapon sa Marso 31, 2014 hangtud sa Septiyembre 7, 2015 mikabat sa 700 ka kawani sa 17 ka buhatan sa Kapitolyo ang  napaubos sa drug test ug sa maong gidaghanon 27 niini ang positibo sa paggamit og ginadiling drugas. – /EIM) (BANAT NEWS)