Way napositibo apan daghan ang drug users
CEBU, Philippines – Walay napositibo sa surprise drug test sa mga opisyal ug kawani sa Brgy Apas ug San Roque samtang upat ka mga kawani usab sa Brgy. Punta Princesa ning dakbayan sa Sugbo ang miangkong tiggamitan og ilegal nga drugas.
Niadtong Lunes gipaubos sa surprise drug test ang 117 ka opisyal ug kawani sa Apas sa mga sakop sa Cebu City Office for Substance Abuse Prevention (COSAP), unom niini miangkon nga sila tiggamitan og drogas.
Matud sa pangulo sa COSAP Dr. Alice Utlang ipaubos ang unom sa ilang rehabilitation program nga mao usab ang gustong mahitabo ni Kapitan Ramil Ayuman.
Iyang susihon ang performance sa unom kun angay ba silang tangtangon sa serbisyo o dili.
Samtang sa 12 ka tanod sa Brgy. San Roque niadtong Sabado, wala usab nagpositibo gawas sa upat nga niangkon nga daan na sila tiggamitan og ginadili nga drugas.
Samtang upat sa pito ka mga garbage loaders sa Brgy. Punta Princesa nga gipaubos sa drug test ang miangkong tiggamitan og gidili nga drugas.
Mao na kini ang ika 15 ka barangay sa dakbayan nga gipaubos sa surprise drug test nga gihimo tungod sa hangyo sa ilang mga kapitan. – /EIM) (BANAT NEWS)
- Latest
