CEBU, Philippines – Gipahunong sa Department of Labor and Employment ang duha ka proyekto human tagsa ka trabahante ang naaksidente gumikan kay wala’y personal protective equipment.
Kini mao ang warehouse construction sa Mayspring Corporation sa Jugan, Consolacion ug Hyundai Showroom and Service Center sa dalan J. De Veyra, North Reclamation Area, dakbayan sa Sugbo.
Matud ni DOLE-7 Director Exequiel Sarcauga nga nakadawat sila og taho may labot sa usa ka trabahante og canopy sa warehouse sa Mayspring Construction nga naaksidente.
Sa gihimo’ng pakisusi ni Engr. Jan Archie Lua, nasuta nga usa ka mason ug steel man ang wala magsul-ob og full body harness diha’ng naaksidente.
Giingong lakip ang contractor sa proyekto nga M.D. Dolayba Construction ang nakalapas sa mga gikinahanglan sama sa pagpakgang sa sunog, safety officer, red-cross trained first aider, nurse ug emergency medicine.
Laing reklamo ang nadawat sa DOLE-7 diin matud pa adunay naaksidente sa gitukod nga showroom ug service center sa Hyundai.
Sigon ni Sarcauga nga usa ka 19-anyos nga trabahante nga naila nga si Junrey Elegino, usa ka panday, ang natagak samtang nagtrabaho.
Giisyuhan og stoppage order ang contractor nga mao ang Solid Construction Cebu, Inc. ug ang Bautista Manpower Services nga mao’y sub-contractor.
Nasuta usab nga wala'y Philippine Contractors Accreditation Board (PCAB); DOLE approved Construction Safety and Health Program (CSHP); Heavy Equipment Testing Certificates; ug TESDA Certificate alang sa skilled workers sama sa welders, electricians, scaffolding installers, ug heavy equipment operators. – /GMR) (BANAT NEWS)