Magpabiling kura paroko

CEBU, Philippines – Magpabilin gihapon nga kura paruko sa San Vicente Ferrer Parish sa Brgy. Bitoon, lungsod sa Dumanjug bisan pa man sa kontrobersya nga iyang giatubang karon.

Si Father William Ybañez gireklamo nga nanapat og tindera sa usa ka burger shop ug laraw sa mga barangay opisyal nga pahulipan siya isip kura sa lugar.

Matud pa ni Archbishop Jose Palma sa Archdiocese of Cebu aduna nay imbestigasyon nga gihimo si Msgr. Vicente Rey Penagonda, ang vicar general batok kang Ybañez.

Wala pa siyay nadawat nga rekomendasyon kun gikinahanglang ibalhin og laing parokya si Ybañez.

Gibutyag ni Palma dili makiangayong suspensuhon ang usa ka tawong gipaubos sa imbestigasyon tungod kay ang pagsuspenso susama na kini og pagsilot ug dili na hinuon makahimo sa iyang buluhaton sa iyang kaakohan sa katawhan.

Sumala pa ni Palma, andam nilang tahuron bisan unsay desisyon sa korte karong naglaraw si Teresita Sambrana nga mopasaka og kaso batok sa maong pari human matud pa gisumbag kay giguba niini ang kandado sa compound sa simbahan aron lang pagkuha og stocks sa ilang baligya.

Gipasabot hinuon ni Palma nga gikinahanglang mangayo og pasaylo si Ybañez sa babaye tungod sa nahitabo.

"In principle we should not be ashamed to say sorry, I’m sad kay normally you should be gentle to the women, murag mauwaw ka nga babaye ang gibatukan, but we will not judge what happen,” matud pang Palma.

Matud pa sa arsobispo, kun mapamatud-an sa korte nga sad-an si Ybañez angay usab niining atubangon ang silot.

Giampo usab niya nga dili one-sided ang estorya batok kang Ybañez aron angay sa tanan ang hustisya.

Dugang pa ni Palma nga katungod usab sa katawhan ang mopetisyon batok kang Ybañez ug andam niya sila nga paminawon ug susihon ang merito sa ilang reklamo ug ingon man paghatag og kahigayonan kang Ybañez makapadayag sa iyang sentimiyento.

Subling gipahinum-doman ni Palma nga ang mga pari sama sa ubang tawo masayop usab, apan malaumon siya nga mas tan-awon sa katawhan ang mas daghan pang maayong nabuhat sa mga pari. – /EIM) (BANAT NEWS)