Mga biktima sa solicitation pakihaon
CEBU, Philippines – Giawhag sa kapolisan ang mga biktima sa solicitation gamit ang logo sa dakbayan sa Sugbo ug Mandaue nga mopatim-aw sa ila’ng buhatan human sa pagkasikop sa duha ka suspek.
Kini aron madugangan ang kaso nga isang-at batok sa mga dinakpan nga sila si Emmanuel Ravena, taga Pardo, dakbayan sa Sugbo ug Jonathan Entil kinsa mao’y silbing messenger.
Hangyo usab sa kapolisan ngadto sa mga kompanya nga makadawat og mga solicitation letter nga i-validate tinuod ba labi na kung may logo sa buhatan sa gobiyerno.
Matud ni Supt. Josefino Ligan, hepe sa City Intelligence Branch sa Mandaue City Police Office, nga nabuking ang modus sa mga dinakpan human si Ravena nipadala og solicitation letter sa usa ka tighimo og bildo kinsa dali’ng nitawag sa Mandaue City Hall aron pag-verify.
Nihatag og certification ang Mandaue City Hall nga wala’y Emmanuel Ravena nga nagtrabaho nila hinungdan nga nihimo dayun og dinaliang aksyon ang kapolisan nga niresulta sa pagkasikop sa duha sa gihimo’ng entrapment operation.
Sigun ni Ligan nga taud-taud na nga naglihok ang modus sa duha ka dinakpan base sa ilang records diin nabiktima ang tulo ka establesemento sa Maguikay, Casuntingan ug usa sa dakbayan sa Sugbo. Mag-atubang og kaso’ng usurpation of public office ang duha ka dinakpan. – /GMR) (BANAT NEWS)
- Latest
