CEBU, Philippines - Kapin sa P1 ka milyon nga shabu ang nasakmit sa kapolisan diha nga gironda nila ang hideout sa gituohang “level 2” drug pusher nga usa ka babaye didto sa Barangay Poblacion, Badian kagahapon sa buntag.
Ang mga sakop sa PNP Regional Special Operations Group (RSOG)-7 nga gipangulohan ni Senior Inspector Romeo Sentinta mironda sa gipuy-an ni Jeramie Matugas, 42, base sa search warrant nga giisyu sa hukmanan.
Si Regional Trial Court (RTC) Judge Macaundas Hadjirasul miisyu og search warrant ngadto sa kapolisan human kini makumbensir nga si Matugas nagtipig g’yud og ilegal nga drugas sa iyang gipuy-an.
Matud sa kapolisan nga tayming gayud kaayo kay atol sa ilang pagsulod sa balay ni Matugas nagbahig pa kini sa mga shabu aron ipang- apud-apod sa iyang mga sinaligan.
Nasayran ni Senior Inspector Sentinta nga ang teritoryo ni Matugas nga baligyaanan niya’g shabu gikan sa dakbayan sa Carcar hangtud sa lungsod sa Alegria.
Gibutyag ni Sentinta nga kadtong 75-anyos nga si Beatriz Secretaria nga nadakpan sa mga sakop sa PNP Criminal Investigation and Detection Group-7 (CIDG) didto sa dakbayan sa Carcar usa diay sa gisuplayan og drugas ni Matugas.
Matud ni Sentinta nga ang mga silingan ni Matugas gipatuo pa sa suspetsado nga siya nagtrabaho isip kolektor sa usa ka pribado nga kompaniya.
Sulod sa gipuy-an ni Matugas narekober sa kapulisan ang 107 gramos nga shabu nga mikantidad og 1.3 milyon pesos.
Si Matugas nga nahinabi sa Banat News miingon nga niadto pa’ng bulan sa Pebrero siya nagsugod og pamaligya’g shabu gumikan sa kalisod, apan ang kapolisan miingon nga ang inpormasyon nga kapin sa tuig na nga namaligya’g shabu ang dinakpan.
Sa lima ka anak ni Matugas, ang kamaguwangan nag-edad na og 21-anyos samtang upat ka tuig ang kamanghuran.
Matud ni Matugas nga napugos siya pagsulod sa ilegal nga negosyo kay wala na siya hatagi og sustento sa iyang una’ng bana ug siya ang nagbuhi sa iyang mga anak.
Si Matugas anaa karon gitanggong sa selda sa RSOG-7 ug gitakda nga karong Lunes pasakaan siya og tukma nga kaso. (Jojo C. Ugdol/RUB)(BANAT NEWS)