CEBU, Philippines - Pito na ka sakyanan nga gigamit alang sa mga delegado sa APEC Summit ang nalambigit og aksidente sa kadalanan dinhi sa dakbayan sa Sugbo sukad kaniadtong Agosto 22.
Sa pito ka sakyanan nga naaksidente, tulo niini ang naareglo ra, samtang ang uban padayon pa nga giimbestigar sa Traffic Investigation Section sa Cebu City Transportation Office.
Si CCTO executive officer Rey Gealon nitataw nga ang aksidente nakamugna lang og kadaot sa mga sakyanan ug wala kini maglambigit og pagkasamad sa mga sakay niini.
Matud ni Gealon nga bisan og ang mga sakyanan gigamit sa APEC apan dili sila “exempted” sa balaod sa trapiko. Ang mga sakyanan gigamitan og Commemorative Plates nga APEC Summit 2015.
Si Gealon miawhag sa mga drayber sa APEC vehicles nga mosunod ra g’yud sila sa tukma nga lagda sa trapiko ug dili magsalig sa plate number kay dakpon gayud sila sa mga traffic enforcers. Ang mga APEC vehicles, sagad mga vans, gikontrata kini gikan sa mga “rent a car” companies sa Manila.
Matud ni Gealon nga mangayo sila og pasaylo sa publiko nga madelatar ang ilang biyahe, ilabi na kun mogawas na ang mga delegado sa APEC Summit paingon sa lainlaing destinasyon.
Ang APEC meet molungtad pa hangtud sa Nobiyembre hinungdan nga nihangyo si Gealon nga hatagan ang mga traffic enforcers og mga sakyanan nga ilang magamit. (BANAT NEWS)