Admin aide ni Rama mobayad sa P1.8M
CEBU, Philippines - Nisaad si Carlos "Charlie" Reyes III, administrative assistant ni Mayor Michael Rama, ngadto kang City Accountant, Atty. Mark Russel Salomon, nga mobayad na lang sa mga wala makwenta nga cash advances nga mobalor og P1.8 milyones. Matud ni Salomon nga P6 milyones unta ang buhatan og liquidation ni Reyes apan sa hinay-hinay nakahimo na kini og partial liquidation.
Sumala pa ni Salomon nga gipugngan ang sweldo ni Reyes sulod sa upat ka buwan sa nilabay nga tuig aron makahatag kaniya og kahigayunan nga molihok sa iya’ng liquidation.
Apan nagproblema lang kini gumikan kay dunay mga dokumento nga dili na niya makita ilabi na kadto’ng mga opisyal nga nangapilde na ang wala na’y gana motabang sa paghimo sa liquidation.
Gibalik ang suhulan ni Reyes tungod sa tawhanong rason human nakita usab nga nilihok kini ug aron usab dili madelatar ang mga bayronon niini sama sa mga remittances.
Ang City Accountant nibutyag nga sayud siya nga na-implementar gyud ang mga proyekto sa sports sa kabarangayan ug ang problema lang tungod sa mga nagkuwang nga dokumento nga maglisud na pagpangita si Reyes ilabi na daghan sa mga barangay opisyal nga nakadawat ang wala na usab nilihok. Si Salomon nibutyag nga kinahanglan gyud ibalik ni Reyes ang kantidad sa kwarta nga iya’ng nakuha ug i-justify nga wala’y malversation.
Ang City Accountant andam mohatag sa tanang dokumento nga pangayuon sa City Legal Office sa higayun nga mopasaka sila og kaso batok ni Reyes.
Samtang si City Treasurer Diwa Cuevas sa iya’ng bahin nibutyag nga iya na gipursige si Reyes nga makigtagbo kaniya aron tukion ang may kalabutan sa wala makwenta nga cash advances.
Sumala pa ni Cuevas ang mayor adunay katungod nga momando sa City Legal Office nga mopasaka og kaso batok ni Reyes ug ang City Accountant mao’y mopaguwa sa dokumento ug kay iya man kini’ng sakop iya’ng pursigehon nga moatubang ug mopatin-aw sa tanan. (BANAT NEWS)
- Latest
