LP sa una’ng distrito makigtagbo ni Roxas
CEBU, Philippines - Mopahigayun og tigum ang mga sakop sa Liberal Party (LP) sa una’ng distrito sa probinsiya sa Sugbo kauban ni Department of Interior and Local Government (DILG) Secretary Mar Roxas II.
Kini ang gibutyag ni Provincial Legal Officer, Atty. Orvi Ortega, aron mapadayag ang mga sentimento kabahin sa panag-ilog sa duha ka grupo.
Si Kongresista Gerald Anthony “Samsam” Gullas Jr. ang gitudlo ni Roxas nga chairman sa LP sa una’ng distrito bisan sakop siya sa Alayon Party.
Ang Alayon nakig-alyansa sa LP hinungdan sa kasagmuyo sa mga sakop sa LP sa distrito.
Ang Alayon nipadayag nga mosuporta kang Gobernador Hilario Davide III, Bise Gobernador Agnes Magpale ug kang Roxas sa umaabot eleksiyon.
Matud ni Ortega nga wala’y pormal nga appointment ug ang pagtudlo kang Gullas “verbal” lang. Si Ortega nibutyag nga ang mga sakop sa LP sa una’ng distrito nakigtagbo na ni Davide niadtong Biyernes.
Lakip sa nitambong si Mayor Johnny De los Reyes ug Bise Mayor Romeo Villarante sa dakbayan sa Talisay kinsa giingong mag-atbang sa eleksiyon sunod tuig. Si Mayor Antonio “Abe” Canoy sa lungsod sa San Fernando ug Bokal Raul “Yayoy” Alcoseba sa una’ng distrito ang nipasiugda sa tigum.
Si Canoy ang gikataho’ng modagan isip kongresista sa una’ng distrito ubos sa LP atbang kang Gullas. (BANAT NEWS)
- Latest
