CEBU, Philippines – Nadakpan ang upat ka tawo ug nasakmitan og ubay-ubay nga pinakete nga gituohang drugas sa pagpangronda nga gihimo sa mga sakop sa Parian Police Station sa sitio Eagles, T. Padilla, dakbayan sa Sugbo pasado alas 10 sa nakalabay nga gabii.
Apan ang target sa kapolisan nga si Cindy Barrientos, hingkod, nakasibat.
Bitbit ang search warrant nga giisyu ni RTC Judge Wilfredo Navarro, ang operasyon gipangulohan sa hepe sa Parian Police Station, Chief Insp. Ryan Devaras.
Sa wala pa gihimo ang pagpangronda, gihimo una ang pipila ka adlaw nga pagpaniid sa mao’ng dapit ug nahibaw-an nga gihimo sab nga suyopanan ang gipuy-an sa suspek.
Sulod sa drug den nadakpan ang upat ka tawo nga sila si Paulino Logronio, 38; Agustin Abad, 49; Wilson Edillion, 24 ug Markin Abadia, 22 kinsa pulos pasakaan og kaso nga pagbisita sa drug den.
Narekober sa kapolisan sulod sa suyopanan ang 20 ka pakete sa gituohang shabu ug mga drug paraphernalia.
Gitanggong na sa selda sa Parian Police Station ang upat ka dinakpan. – /GMR) (BANAT NEWS)