Polis nalimbuwadsa motor angol

CEBU, Philippines – Grabeng naangol ang usa ka polis nga sakop sa Bogo City Police Station diha’ng ang motorsiklo nga iya’ng giluwanan ang kalit lang nalimbuwad sa dulhugon nga bahin sa barangay La Paz  alas 7 pasado sa niagi’ng Lunes sa gabii.

Si Police Officer 3 Edwin Dignos, imbestigador sa traffic section sa Bogo City Police Station, niila sa biktima nga si Police Officer 1 Gilbert Solosco Aguido, 37, minyo nga nagpuyo sa mao’ng dapit.

Matud ni Dignos nga gikan pa sa duty ang biktima ug padulong na pauli sa ila’ng panimalay diha’ng wala nakakontrol sa iya’ng pagpadagan samtang nagdulhog hangtud nalimbuwad paingon sa gutter ug nalamba.

Gumikan sa kakusog sa impact sa pagkalamba, ang biktima  nakasinati og kadaut sa iya’ng kalawasan ug nawad-an kini sa panimuot nga nahidangat sa Bogo District Hospital.

Si Dignos niingon nga luwas na hinuon ang biktima sa kuyaw nga kahimtang kagahapon apan nagkinahanglan pa kini’ng magpaalim sa mga pangos ug bun-og sa kalawasan sulod sa tambalanan. – /GMR) (BANAT NEWS)