Hukom sa usbaw sa suhulan gi-oktaba

CEBU, Philippines – Gi-oktaba sa Regional Tripartite Wages and Productivity Board-7 ang pagtuki sa usbaw sa suhulan karong Septiyembre 10 hangtud 18.

Matud ni Jose Tomongha, labor sector representative sa RTWPB-7, nga humana ang ila’ng consolidation sa mga position papers nga giduso sa mga lainlaing business chamber ug organisasyon labot sa petisyon.

Sila si Metudio L. Belarmino Jr. sa Living Wage Coalition ug Arturo Baritt sa Associated Labor Unions-Trade Union Congress of the Philippines ang niduso og petisyon sa usbaw sa suhulan niadto’ng Agosto 13. Ang APL niduso og P145 nga usbaw sa minimum nga suhulan samtang ang ALU-TUCP niduso og P92.00 nga usbaw matag adlaw sa tanang mamumuo sa Central Visayas.

Atol sa public hearing, gisupak sa mga negosyante ang petisyon.

Kini naglakip sa Confederation of Philippine Exporters-Cebu; Hotels, Resorts and Restaurants Association-Cebu; Cebu Chamber of Commerce and Industry, Philippine Retailers Association-Cebu Chapter, Siquijor Chamber of Commerce and Industry, Bohol Chamber of Commerce and Industry, Mandaue Chamber of Commerce and Industry, Panglao Island Chamber of Commerce and Industry ug Bohol Association of Hotels, Resorts and Restaurants.

Si Dennis Derige, tigpamaba sa Partido ng Manggagawa-Cebu, nagkanayun nga panahon na nga ihatag sa mga negosyante ang angay sa mga mamumuo.

Si Tomongha naglaum nga may usbaw sa suhulan sa dili pa matapos kini’ng tuiga.

Ang kasamtangang minimum nga suhulan sa Central Visayas sa pagkakaron anaa sa P340 matag adlaw. (Gikan sa The Freeman/GMR)