Pelaez padayun sa krusada sa Lapu-Lapu

CEBU, Philippines – Padayunon sa negosyante nga si Efrain “Jun” Pelaez ang iya’ng krusada batok sa korupsiyon ug kahugaw sa dakbayan sa Lapu-Lapu sunod tuig.

Kini human iya’ng gipahibawo ang ikatulo niya’ng pagpapili sa pagka-mayor sa dakbayan ubos sa Liberal Party sa 2016 nga eleksiyon batok sa mga Radaza.

Matud ni Pelaez nga dili sila mohunong sa krusada nga ila’ng gisugdan sukad pa niadto’ng tuig 2007 nga wala pa siya niapil sa politika.

Bisan nagpasakop na sa LP sila si Mayor Paz Radaza ug anak nga si Kongresista Aileen Radaza, matud ni Pelaez nga siya ang orihinal nga LP ug nagdala sa tinuoray nga “daang matuwid.”

Gitumong sa kampo ni Pelaez ang pagpahibawo sa ila’ng kandidatura atol sa National Hero’s Day kagahapon gumikan kay sila nagtuo nga panahon na nga ipakita sa katawhan sa dakbayan nga sila ang matuod nga bayani sa siyudad.

Si Rene Espina Jr., anak ni kanhi gobernador ug senador Rene Espina Sr., ang nipahibawo usab sa pagdagan sa pagka-kongresista sa dakbayan.

Gihimug-atan sa grupo nga modaug o mapilde, dili sila mosurender sa ila’ng tinguha nga kausaban sa dakbayan. – /GMR) (BANAT NEWS)