CEBU, Philippines – Gipusil sa usa ka polis ang tomboy nga nakadunggab og laing tomboy nga iyang gikaaway tungod sa pag-ilogay nila sa usa ka babaye.
Ang pagpanunggab ug pagpamusil didto mahitabo sa dalan Junquera nga sakop sa Barangay Kamagayan, dakbayan sa Sugbo sa miaging Domingo sa gabii.
Si PO1 Raffy Abayon, sakop sa Carbon Police Station, napugos sa pagpusil sa bitiis ni Abel Rodriguez, 19-anyos, kay wala kini mopatuo nga gibadlong sa polis nga dili na manunggab.
Sa imbestigasyon nga gihimo ni SPO4 Alex Dacua sa homicide section sa Cebu City Police Office (CCPO) nasayran nga menor de-edad ang tomboy nga gidunggab ni Rodriguez.
Ang menor de-edad nga tomboy gikataho nga lumad nga taga Moalboal ug nagtrabaho sa usa ka bakeshop sa maong dapit. Si Rodriguez nagpuyo sa Barangay Basak, dakbayan sa Mandaue.
Nasayran ni SPO4 Dacua nga “love triangle” nga naglambigit og laing babaye ang hinungdan sa panag-away sa duha ka tomboy.
Ang 17-anyos nga tomboy nagpaabot sa iyang higala daplin sa karsada diha nga giduol ni Rodriguez ug nagsultihanay ang duha. Diha nga mibiya na ang menor de-edad, gikalitan kini’g dunggab ni Rodriguez sa buko-buko.
Usban pa unta’g dunggab ni Rodriguez ang batan-ong tomboy apan gipusil siya sa polis.
Nasayran nga nasuko si Rodriguez kay ang batan-ong tomboy nagkarelasyon ug ang kanhi girlfriend sa suspetsado. – /RUB) (BANAT NEWS)