Garcia nireklamo, polis gihimo’ng body guard
CEBU, Philippines – Giawhag ni Dumanjug Mayor Nelson Garcia si Cebu Provincial Police Office Director Noel Gillamac sa pag-imbestigar sa iya’ng mga sakop nga giingong gihimo’ng personal bodyguards sa managsuong Gica.
Sa suwat ngadto kang Gillamac nga gipetsahan og Agosto 20, si Garcia nitumbok sa mga sakop sa Special Weapons and Tactics (SWAT) ug kapolisan sa lungsod sa Dumanjug nga gigamit nila’ng Bise Mayor Efren Guntrano Gica ug Konsehal Erwin Gica sa pagpanghasi sa mga opisyal sa barangay ug iya’ng mga supporters.
Apan ang mao’ng pasangil hugot nga gihimakak ni Bise Mayor Gica.
Matud ni Gica nga drayber ra gyud ang pirme niya’ng kuyog sulod na sa 20 ka tuig.
Si Garcia niila sa mga polis nga sila si PO2 Sabeniano “Edward” Saromines Jr., PO2 Danny Camero ug PO1 Nestor Villanueva.
Kopya sa suwat ni Garcia gipadala usab ngadto sa Police Regional Office-7, National Police Commission ug sa Office of the Ombudsman for the Military ug ubang Law Enforcement Offices. (BANAT NEWS)
- Latest
