CEBU, Philippines – Nagtinguha si Senador Antonio Trillanes IV sa pagpaubos sa Senate inquiry sa giingong anomaliya sa pagkaon sa kapolisan nga nagbantay sa Asia-Pacific Economic Cooperation (APEC) Summit sa Sugbo.
Si Trillanes nga nibisita sa Sugbo sa niagi’ng adlaw nagkanayon nga pangutan-on ang kadagkuan sa Philippine National Police (PNP) ug Department of Interior and Local Government (DILG) aron mahibaw-an kung kinsa ang responsable sa anomaliya.
Ang Police Regional Office-7 andam moatubang sa imbestigasyon.
Si Senior Superintendent Rey Lyndon Lawas, hepe sa Regional Directorial Staff sa PRO-7, nagkanayun nga dugay na nila nga nasulbad ang isyu.
Sa pagkakaron, ang kapolisan aduna na’y gahin nga P300 sa meal allowance matag adlaw apan ang pagpanghatag dili na kwarta ug deretso na sa packed meals gikan sa caterer.
“Wala ra mi problema ana,” matud ni Lawas.
Kahinumdoman nga adunay nangreklamo sa una’ng mga adlaw sa APEC Summit sa Sugbo tungod kay nakakuha lang sila og P150 nga meal allowance sukwahi sa giingon ni PNP Police Director General Ricardo Marquez nga tag P500 matag adlaw. – /GMR) (BANAT NEWS)