CEBU, Philippines – Nalandig sa tambalanan ang amahan ug anak nga gikulata ug gipusil sa mga lalaki nga gikakontra sa ilang kauban sa trabaho nga ilang giuwang sa panag-away didto sa dalan Andres Abellana, Barangay Guadalupe, dakbayan sa Sugbo.
Ang mga biktima mao sila si Bertuldo Anito, 50, ug ang iyang anak nga si Wilbert Anito, 30, pulos mga construction worker ug lumad nga taga Negros Oriental.
Ang suspetsado giila nga si Melvin Lañojan, nga nagtrabo ra sab sa maong construction site, ug ang mga kauban niini nga abtik kaayo nga misibat. Matud pa ni PO1 Salvador Cabasa sa homicide section sa Cebu City Police Office (CCPO), nga ang kauban sa trabaho ni Bertuldo nga si Quilmar Dela Cruz nakakita og away ni Lañojan ug si Bertuldo igo lang unta nga miuwang aron maundang ang away.
Imbes mopatuo, gitabangan hinuon si Bertuldo ug gikulata sa mga kauban ni Lañojan. Ang anak ni Bertuldo nga si Wilbert milaban sa iyang amahan apan gipusil siya sa tiyan sa laing kauban ni Lañojan.
Human sa hitabo dali ‘sab nga misibat ang mga suspetsado samtang gipangdala sa Cebu City Medical Center (CCMC) ang amahan ug anak.
Si Cabasa miingon nga sa nakuha nila nga impormasyon nga una nga nagkaaway si Dela Cruz ug Lañojan atol sa ilang panag-inom.
Kaso’ng frustrated murder ang andamon sa kapolisan aron ipasaka batok sa mga suspetsado kun sila mailhan ug madakpan. – /RUB) (BANAT NEWS)