CEBU, Philippines - Ang konseho sa dakbayan sa Sugbo miawhag ni Mayor Michael Rama nga hatagan og abogado nga makalaban kanila kadtong mga polis nga mag-atubang og kaso tungod sa pagtuman nila sa ilang katungdanan. Gisuportahan sa mga sakop sa konseho ang resolusyon ni Konsehal Nestor Archival nga nagpakabana sa kahimtang sa mga polis nga maproblema kun sila pasakaan og kaso sa ilang mga dinakpan.
Nakabantay si Archival nga samtang ang Philippine National Police (PNP) adunay kaugalingon nga abogado apan dili kini makaato sa paglaban sa tanang polis nga mag-atubang og kaso nga may kalabotan sa serbisyo.
Matud ni Archival nga daghan sa mga polis ang maproblema sa pagpangita og panggasto sa pagkuha og abogado nga makalaban kanila sa kaso ug sigurado nga maapektahan ang ilang pagserbisyo.
Ang kapolisan sa dakbayan sa Sugbo nangalipay niining lakang ni Archival kay giangkon nila nga daghan sa ilang dinakpan ang mohimo og “counter charges” pinaagi sa pagbutang-butang kanila nga nakahimo og salaod. (BANAT NEWS)