Basura sa siyudad nagkadaghan

CEBU, Philippines - Nagkadaghan ang nakolekta nga basura sa Department of Public Services gikan sa nagkalainlaing barangay sa dakbayan sa Sugbo nga mao’y ilabay ngadto sa pribado’ng landfill sa Consolacion.

Kini ang hinungdan nga nangayo og P87 milyones nga budget ang DPS sa kagamhanan sa dakbayan alang sa tipping fee sa paglabay sa basura.

Matud sa chairman sa committee on environment sa konseho, Konsehal Nida Cabrera, nga nahurot na ang pundo nga gihatag sa siyudad nga P51 milyones sa general fund ug laing P50 milyones gikan sa disaster fund.

Matud sa pangulo as DPS, Rolando Ardosa, nga niadto’ng Enero nakakolekta sila og 460 ka tonelada sa basura matag adlaw ug mas nisaka pa kini niadto’ng Hunyo diin adunay 513 ka tonelada.

Giklaro ni Cabrera nga ang dugang pundo sa DPS nga gipangayo para lang sa tipping fee nga ibayad sa paglabay sa basura ug pag-transport niini. Ang kagamhanan sa dakbayan aduna’y giabangan nga hauling truck nga mohakot sa basura paingon sa landfill. (Sheriza Mae R. Uy/GMR)(BANAT NEWS)