CEBU, Philippines - Nasakmit sa kapolisan ang P2.5 milyones nga shabu atol sa gipahigayon nga buy-bust operation didto sa Sitio Locatha, Brgy. Looc dakbayan sa Lapu-Lapu sa miaging alas 6:30 Huwebes sa gabii.
Unang nadakpan ang level 2 drug pusher mao si Brian Singson, 34, ug ang gikatahong sidekick niini nga si Reyjan Esmalin, 33 , pulos mga residente sa gihisgutang dapit.
Nagkanayon si Police Senior Inspector Verniño Noserale, hepe sa Lapu-Lapu City Police Office - City Intelligence Branch nga si Singson mao ang target sa operasyon.
“Although nagbase ni siya sa Looc, sila ang adtuon sa ilahang customers kay di man siya mobaligya og ginagmay,” dugang ni Noserale sa Banat News.
Nasakmit kang Singson ang pito ka dagkong putos, usa ka medium size nga pakete sa shabu, ang P6,000 nga budol money, laing P5,000 nga gituohang halin sa drugas, usa ka KG9 sub-machine pistol nga adunay 10 ka bala ug drug paraphernalia.
Samtang usa ka slingbag, upat ka medium pack sa shabu ug .38 calibre nga armas nga adunay duha ka live ammunition rounds usab ang nakuha kang Esmalin.
Lola pusher
Samtang nadakpan sa Criminal Investigation and Detection Group-7 ang 75-anyos nga lola nga namaligya og shabu ug nakuhaan og kapin P200 mil nga kantidad sa drugas atol sa operasyon diha sa Sitio Cambontan, Brgy. Bolinawan sa dakbayan sa Carcar kagahapon sa buntag.
Ang dinakpan giila nga si Beatriz Secretaria, nagpuyo sa maong dapit.
Gawas kaniya gisikop og apil ang iyang anak nga si Ethel Intong, 42, bana niining si Marcelo Intong, ug sila si Albert Delantar ug Regino Cabaluna. Ang operasyon gihimo pinasikad sa search warrant nga giisyu ni RTC Judge Soliver Peras. Ang maong operasyon gipangulohan sa deputy chief sa CIDG-7, Superintendent Fermin Armendarez III.
Ang officer in-charge sa CIDG-7 nga si Superintendent Marlon Tayaba miingon nakuha sa mga operatiba ang usa ka medium size ug 240 ka gagmay nga pakete sa gituohang shabu nga mikantidad tanan og P235 mil.
Si Secretaria mitug-an sa mga tigbalita nga napugos lang kini sa pagpamaligaya og drugas aron dunay ikapalit og tambal sa iyang highblood ug nahadlok usab siya sa hulga sa tigsuplay sa drugas nga patyon siya kun mohunong siya pagpamaligya.
Mitug-an ‘sab siya nga nadakpan na siya sa susamang kaso niadtong nakalabay nga tuig.
Nag-birthday sa prisohan
Samtang sa lungsod sa Argao, gisaulog sa usa ka Joycee Loyola, ang iyang ika-30 nga adlaw nga natawhan human kini nadakpan kauban ang upat ka mga lalaki sud sa usa ka drug den sa Brgy. Binlod niadtong nakalabay nga adlaw. Lakip sa nasikop ang tag-iya sa balay nga si Alfonso Parantar, 42, ug mga kauban nga sila si James Remon Labajo, 25, Dave Geverola, 20 ug James Rue Dejoya, 20. Si Senior Inspector Alejandro Batobalonos, hepe sa Argao Police nga nahinabi sa Banat News miingon nga dunay mitawag kaniya ug mipahibalo bahin sa mga tawong nanuyop sa balay ni Parantar maong ilaha kining giadto.
Nasakpan sa akto ang mga suspetsado samtang nanuyop og gituohang shabu hinungdan nga sila gipangsikop. (Christell Fatima Tudtud ug Jojo C. Ugdol/EIM)(BANAT NEWS)