CEBU, Philippines - Patay ang usa ka sa 2-anyos nga batang babaye human gigulgol ang liog niini sa iyang 50- anyos nga lola diha sa Brgy. Tubod sa dakbayan sa Toledo alas-4:30 kagahapon sa sayong buntag.
Giila ang biktima nga si Jemigan Basalo, 2, samtang ang apohan niini nga gidala na sa Psychiatric Ward sa Vicente Sotto Memorial Medical Center giila nga si Melianida Macapaz Pelarca kinsa gituohang adunay deperensiya sa pangisip.
Base sa imbestigasyon ni Senior Police Officer 2 Benedicto Bobiles, imbestigador sa Toledo City Police Station, napalgan na lang ang bata nga wala na maglihok ug dunay dakong laslas sa liog.
Gidala kini sa Toledo City Hospital apan patay na ang maong bata bisan giunsa pagtabang ni Dr. Clyde Vincent Bequilla tungod sa kalawom sa samad diha sa ubol-ubol niini.
Dihang nangabot ang kaparyentihan, ilang naabtan ang apohan nga nagkupot og mahait nga hinagiban ug misuway kini pagdunggab sa iyang tiyan pagkakita kanila apan ilang napugngan.
Dihang nahinabi ang maong lola nagkanayon kini nga adunay gustong mokuha sa iyang apo aron dad-on sila sa Ormoc, apan taud-taod miingon na usab kining adunay gustong mopatay kanila.
Tungod kay di niya gustong mawala kaniya ang apo iyang gigulgol ang liog sa bata ug maghikog usab kini.
Ang suspek gidala usab sa tambalanan niadtong Agosto 21 human naglaslas kini sa iyang pulso ug buot untang moambak sa Toledo City Port Terminal, apan Agosto 26 nakagawas kini sa tambalanan. (BANAT NEWS)