Live wire gikawat pa

CEBU, Philippines - Mokabat sa kapin sa P50 mil nga kantidad sa mga wire ang gikawat sulod sa usa ka daku’ng construction company sa Banawa, dakbayan sa Sugbo sa nakalabay nga hapon.

Si Jaime Arcillas, 30, electrician sa kompaniya, nga nahinabi sa Banat News kauban ang laing electrician, niingon nga nakabantay sila nga nawala na ang wire sa welding human sila nagpasiga sa mga suga sa gitrabahoan. Gibana-bana nga kapin sa 30 metros nga wire ang giputol ug wala na nakita sa mao’ng dapit.

Sa pagsubay pa nila sa ubang lugar nasuta nga lakip sa giputol ug nadala sa kawatan ang laing wire sa grounding kit nga para sa kilat ang giapil og putol nga gibanabana nga anaa sa 20 metros ang gitas-on.

Sumala pa ni Arcillas nga ang kawatan nigamit og sakto nga cutter kay ang wire sa grounding kit “live wire” kini diin kung wala’y saktong cutter nga gamiton segurado’ng makuryentehan ang magputol.

Ang safety engineer sa kompaniya nga si Von Tan nga nahinabi sa Banat News niingon nga lagmit inside job ang dagan sa pagpangawat kay yano ra kaayo nga nakasulod sa ilang gitrabahoan ang kawatan.

May guwardiya usab ang kompaniya apan wala gyud nakabantay sa pagpagawas sa mga wires. (BANAT NEWS)