93-1 padayung giatiman sa Kapitolyo

CEBU, Philippines - Giatiman sa kagamhanan sa probinsiya sa Sugbo ang pagsulbad sa isyu sa 93-1.

Kini ang gipadayag ni Gobernador Hilario Davide III human subli na usab nga gibasol ni Bise Presidente Jejomar Binay ang Kapitolyo nga mao’y naglangan sa pagsulbad sa isyu.

Si Binay mao kanhi ang pangulo sa Housing and Urban Development Coordinating Council (HUDCC) nga nanginlabot sa pagsulbad sa isyu.

Matud ni Davide nga matag bisita ni Binay sa Sugbo kung pangutan-on bahin sa isyu sa 93-1 kanunay niini’ng basulon ang Kapitolyo.

Si Davide nagkanayun nga si Binay wala’y kalibutan sa mga nahitabo.

Gitun-an sa probinsiya ang mga proposal sa dakbayan sa Sugbo ug sa ubang homeowners association.

Gibutyag sa gobernador nga sulod niini’ng buwana adunay workshop alang sa kasulbaran sa isyu sa 93-1.

Lakip sa gitun-an ang tanyag sa kagamhanan sa dakbayan sa Sugbo nga mohatag og P500 milyones isip bayad sa luna nga gipuy-an sa mga residente nga nasakop sa 93-1.

Niadto’ng 1993 ang probinsiya nipalabang sa Ordinansa 93-1 nga naghatag sa pagtugot sa mga nagpuyo nga mopalit sa luna apan wala kini natuman hangtud karon. (BANAT NEWS)