CEBU, Philippines - Wala’y gamit ang 34 ka fire hydrants sa dakbayan sa Sugbo nga nahimutang sa pipila ka barangay ug nagkinahanglan nga ayuhon.
Matud ni Konsehal Dave Tumulak nga kini base sa giduso sa Bureau of Fire Protection nga listahan sa mga fire hydrants.
Sa kinatibuk-an adunay 259 ka fire hydrants ang dakbayan nga nahimutang sa mga substations sa Guadalupe, Labangon, Lahug, Mabolo, Pahina Central, Pardo, Parian, San Nicolas ug Talamban diin 225 ang maayo.
Dugang ni Tumulak nga adunay mga fire hydrants nga naa sulod sa balay ug nakaali sa kadalanan samtang ang uban anaa sa pribado’ng luna.
Gipaabot na lang karon ni Tumulak ang mga kinahanglan nga palitonon aron mapaubos na nila sa bidding tungod kay ang ila’ng buhatan ang mogasto.
Si Chief Inspector Rogelio Bongabong, fire marshall sa dakbayan, nibutyag nga daku gyud og tabang dili lang sa huwaw ang pag-ayo sa mga fire hydrants lakip na usab ang pagtubag sa mga alarma sa sunog.
Dugang ni Bongabong nga ila na karong gilihok ang mga panginahanglanon ug nanghinaut nga mahatagan usab og dinalian nga aksiyon. (BANAT NEWS)