CEBU, Philippines - Gipadayag sa speedboat operator sa Bantay Dagat Commission sa dakbayan sa Sugbo, Renante Pangatungan, nga na-trauma siya sa hulga sa ila’ng hepe nga si retired Major Ramon Ortiz niadto’ng Sabado.
Matud ni Pangatungan nga gipatawag siya ni Ortiz ug kalit lang gikasab-an.
“Giingnan ko buang ka, dili ka motuo nako kay dili ka ako’ng tawo," nagkanayun si Pangatungan.
Matud ni Pangatungan nga iya’ng gipasabot si Ortiz nga bisan kinsa ang molingkod isip pangulo sa Bantay Dagat andam siya’ng mosunod.
Apan sumala pa ni Pangatungan nga giingnan hinuon siya ni Ortiz nga maayo’ng pusilon ug gihan-an og labay sa holster sa armas hinungdan nga naglain ang iya’ng pamati sa lawas.
Si Pangatungan andam mopasaka og kaso batok sa iya’ng labaw.
Apan ang mao’ng pasangil hugot nga gihimakak ni Ortiz tungod kay igo ra niya’ng nakasab-an si Pangatungan human wala motuman sa iya’ng mando sa pagresponde sa emergency sa kadagatan niadto’ng Sabado.
Ang mao’ng insidente sa kadagatan natala sa listahan sa Bantay Dagat nga gipakita ni Ortiz sa media.
Dugang ni Ortiz nga andam niya’ng atubangon ang pasangil ug siya nagtuo nga dunay tawo nga naglagot kaniya ug mao’y nagpaluyo sa reklamo ni Pangatungan.
Si Ortiz nibahad usab nga iya ibutyag ang anomaliya sa pagpalit og mga engine speed sa mga speed boats nga nagkantidad og dul-an sa tunga sa milyon ka pesos. (BANAT NEWS)