CEBU, Philippines – Nangandam na ang Department of Agriculture (DA)-7 sa El Niño human gibutyag sa Pagasa nga makasinati pa kita og mas grabeng kainit nga panahon gumikan niini. Matud ni Joel Elumba, Regional Technical Director sa DA-7 mihimo na sila og massive information campaign ilabi na sa Bohol ug Negros Oriental ug karong Huwebes magsugod na usab sila sa Sugbo .
Pakigkitaan nila ang mga pundok sa mga mag-uuma aron masayod sila sa angay nilang buhaton ini og magsugod na ang kainit sa panahon.
Giawhag usab nila ang mga Local Government Units (LGU’s) nga mangandam nang daan ilabi na kun momenus ang pag-ulan.
Usa sa gisugyot sa DA-7 ngadto sa mga mag-uuma mao ang diversified farming system pasabot niini, dili lang kay usa ra ka tanom ang itanom ug dili mananom og dili makaagwanta sa init nga panahon.
Kahinumdoman nga niadtong buwan sa Abril dunay report nga nadawat ang ahensiya nga apektado kaayo ang probinsiya sa Bohol sa El Niño apan sigon ni Elumba dihang ilahang gisusi, nakaani pa gihapon ang mga mag-uuma. – /EIM) (BANAT NEWS)