CEBU, Philippines – Dakpon na ang mga jeep pasaheroan sa dakbayan sa Mandaue nga dili na molahos sa ilang mga rota tungod sa gipatumang one way traffic scheme sud sa 60 ka adlaw.
Si Glenn Antigua, executive officer sa Traffic Enforcement Agency of Mandaue (TEAM) adunay gibutang nga mga traffic enforcers sa matag eskina sa pagsiguro nga madakpan ang mga drayber nga dili na molahos sa ilang rota.
Usa sa gibantayan mao ang rota nga nagsubay karon sa dalan Sotero B. Cabahug gikan sa A. del Rosario tungod kay daghang nangreklamong pasahero kay dili na molahos sa ilang rota sa Ibabao Estancia kay kutob na lamang sa karaang merkado publiko sila mobiyahe.
Mao usab kini ang problema sa mga sumasakay gikan sa dakbayan sa Sugbo nga mosubay sa A. S. Fortuna ug paingon sa dalan M. L. Quezon kay kutob lang sa eskina flyover sa Maguikay ang mga pasahero ug moliko paingon sa tuo sa M.C. Briones balik na sa dakbayan sa Sugbo, imbes nga molahos sa Ibabao Estancia. – /EIM) (BANAT NEWS)