CEBU, Philippines – Patangtangan ni Cebu City Mayor Michael Rama sa iya’ng mga posisyon sa special body si Konsehal Mary Ann Delos Santos nunot sa iya’ng pagtapon sa kampo ni kanhi mayor Tomas Osmeña.
Si Delos Santos una na nga nibiya isip minority floor leader sa konseho ug nihawa sa Team Rama.
Dugang pa ni Rama nga kinahanglan matangtang si Delos Santos sa posisyon nga siya ang nagtudlo.
Si Rama mokonsulta usab kang Bise Mayor Edgardo Labella sa ubang komitiba nga gikuptan ni Delos Santos.
Kini naglakip isip chairman sa Cebu City Medical Center Board, Cebu City Commission for the Welfare and Protection of Children, Cebu City Women and Family Affairs Commission ug AdHoc Committee.
Si Delos Santos vice chairman usab sa Cebu City Sports Commission ug Cebu City Multi-Sectoral STD/Aids Council.
Miyembro usab si Delos Santos sa Persons With Disability Affairs Office (PDAO), Waterfront Development Commission, Cebu City Private Sector Organizational Evaluation and Monitoring Board, Bids and Awards Committee (BAC) Consignment Advisory Commission, Local Health Board ug Cebu City Resource Management and Development Center (CREMDEC).
Si Delos Santos nibiya sa Team Rama ug nitapon sa Bando Osmeña Pundok Kauswagan (BOPK). – /GMR) (BANAT NEWS)