Daghang nadakpan sa truck ban
CEBU, Philippines – Dul-an sa singkwenta ka mga dagkong sakyanan nga niagi sa ceremonial route sa Asia-Pacific Economic Cooperation (APEC) meet ang naisyuhan og citation tickets sa Cebu City Traffic office.
Matud pa ni Atty. Rey Gealon ang pangulo sa CCTO nga gikahinabi sa Banat News sukad sa pagbukas sa maong kalihokan niadtong Sabado, ubay-ubay na sa mga sakyanan nga sobra sa 6-wheelers ang ilang nasikop.
Base sa memorandum order 20150167 nga giisyu ni Mayor Michael Rama gidid-an una ang maong mga matang sa sakyanan nga makasulod sa mga dalan nga agian sa mga delegado.
Dugang pa ni Gealon, ang truck ban gisugdan niadtong Agosto 22 hangtud sa Septiyembre 5 gikan alas-6 sa buntag ngadto sa alas-10 sa gabii. Ang multa sa makalapas niini P500. Ang CCTO nipahimangno sa mga truckers nga motuman sa truck ban aron dili sila maisyuhan og citation ticket.
Samang truck ban usab ang gipatuman sa dakbayan sa Mandaue diha sa mga agianan sa delegado nga naglakip sa dalan Plaridel nga manukad sa UN Avenue sa Marcelo Fernan Bridge lahos ngadto sa Ouano Avenue sa reclamation area. – /EIM) (BANAT NEWS)
- Latest
