Kaso ni Gica gipugngan sa Ombudsman?

CEBU, Philippines – Giawhag ni Dumanjug Mayor Nelson Garcia si Deputy Ombudsman for the Visayas Paul Elmer Clemente sa pagsusi kung ngano’ng wala molihok ang kaso nga iya’ng gipasaka batok kang Bise Mayor Efren Guntrano Gica.

Nakaaghat kang Garcia mao ang pasiatab ni Gica sa ila’ng lungsod nga dili siya matarug gumikan kay naa nagtrabaho sa buhatan sa Ombudsman ang asawa ni Atty. Joshua Dacumos, konsehal nga kaalyado sa bise-mayor.

Nangayo si Garcia kang Clemente og report sa mga kaso nga iya’ng gipasaka batok ni Gica ug kung unsa na ang status niini.

Ang mga kaso nga gipasaka ni Garcia sa niagi’ng tuig batok ni Gica naglakip sa malversation of public property; malversation of public funds, falsification of public documents, ug violation of the Anti-Graft and Corrupt Practices Act nga kompleto sa mga dokumento.

Si Garcia kasamtangan karong gisuspenso sa kaso’ng administratiba nga gipasaka ni Gica sa hunta probinsiyal sa Sugbo. (BANAT NEWS)