Dakong isda

CEBU, Philippines – Usa ka higanteng isdang Lapu-Lapu o mas naila sa bisaya nga pugapo ang nakuha sa usa ka mananagat didto sa kadagatan sa Masbate niadtong Biyernes.

Ang higanteng isda nga  gitawag sa Englis og Grouper duna’y gitas-on nga mga unom ka tiil kon duha ka metros ug mitimbang kini og 100 ka kilo.

Ang 37-anyos nga manangat ug negosyante nga si Jovannie Alburo nga taga Mandaue City maoy nakakuha niini.

Si Alburo, nga nahinabi sa Banat News mibutyag nga gidala niya sa Mandaue City ang maong isda aron kan-on sa iyang pamilya ug mga higala.

Matud niya sa gidugayon na niya sa panagat, kini maoy unang higayon nga nakakuha siya og ingon niini kadako.

Ang mga pugapo nga iyang makuha kaniadto mokabat lang og duha ngadto sa tulo ka kilo.

“Na-shock ko sa kadako ug nalipay ko nga kapin sa 20 tuig nakong pangisda nakakuha ko og dako kaayong isda,” sigon ni Alburo.

Matud niya, namukot sila sa iyang igsuon ug ig-agaw dihang nabantayan nila ang maong isda sa mabaw nga bahin sa ilang baybayon ug dali nilang gilabayan og pukot alang sa isdang Banban.

Si Alburo lumad nga taga Kawayan, Masbate apan dinhi na nagpuyo tungod sa iyang sa trucking business.

Apan matag aduna siya’y panahon mopauli siya sa ilaha aron managat.

Matud niya nagdako sila sa dagat sama sa iyang amahan ug kabahin na kini sa ilang kinabuhi.

Gani, dihang nagtungha pa siya sa kolehiyo dinhi sa Sugbu maghinamhinam g’yud siya pagpauli sa ilang probinsya matag holidays ug kataposan sa semana aron lang mokuyog og pangisda sa iyang amahan.

Karon nga duna na siya’y pamilya ug tulo ka anak, kini maoy iyang gihimong kalingawan gamit ang iyang napalit nga motorbanca.

Kasagaran sa iyang kuha mga nagkadaiyang matang sa dahul-dahol nga isda nga motimbang og 50 hangtud 100 ka kilo tanan.

Ang kadagatan sa Pilipinas abunda sa mga pugapo tungod kay tropikal ang klima niini. Nagkakusog ang demand sa maong isda sa international market, labi na sa mga nasud sa Hong Kong, Japan ug Singapore.

Ang normal nga pugapo modako hangtod sa 120 sentimetros ug motimbang hangtod 12 ka kilo. Ang pugapo nga nakuha ni Alburo matawag nga pangitaon o talagsaon.

Usa usab ang pugapo sa labing mahal nga isda sa kamerkaduhan. Tungod sa kamahal, sagad mga fine-dining restaurants lang ang mobaligya niini ug kadto lang duna’y kaya ang makakaon. – /EIM) (BANAT NEWS)