Duha lagpot sa motor

CEBU, Philippines - Naabtan pa sa kapolisan sa karsada ang usa ka lalaki ug backrider human nagdinumugay ang ila’ng motor ug multicab pasado alas 9 sa niagi’ng buntag sa Poblacion, Samboan.

Naangol sila si Lyndon Narvios, 29, drayber sa motor, ug angkas nga si Rose Ann Jean Bucag, taga lungsod sa Balamban samtang ang drayber sa multicab giila nga si Luisito Albrando, 31, taga Tangbo, Samboan.

Padulong unta sa Dumaguete City ang mga nagsakay sa motor gikan sa Balamban diha’ng gikasugat si Albrando nga padulong sa Poblacion, Samboan.

Pag-abot sa kurbadahon nga bahin sa Poblacion, giingong nikawat sa pikas lane ang multicab nga gisubay sa motor.

Tungod sa kakalit sa panghitabo wala na makalihay ang duha ka sakyanan hinungdan sa panagbangga ug nalagpot sa karsada ang duha nga sakay sa motor.

Dali’ng niresponde ang mga polis ug nakit-an pa nila sa karsada ang mga biktima hinungdan nga nanawag sila og ambulansya ug gidala sa tambalanan.  (BANAT NEWS)