Kapitolyo mopalit og trak sa mga mag-uuma

CEBU, Philippines - Nagplano ang kagamhanan sa probinsiya sa Sugbo nga mopalit og truck alang sa mga mag-uuma.

Kini human nihangyo ang mga mag-uuma nga palitan sila og truck nga makargahan sa ila’ng mga abot padulong sa merkado.

Ang matag mag-uuma magbayad og P160 sa trucking company nga kargahan sa ila’ng mga baligya paingon sa dakbayan sa Sugbo.

Si Gobernador Hilario Davide III nibutyag nga ang iya’ng uyoan nga si Dr. Romulo Davide, ang Capitol consultant on agriculture, ang nihangyo kaniya.

Matud ni Davide nga giawhag niya ang pangulo sa Provincial Agriculture Office, Dr. Roldan Saragena, nga ilakip sa budget sa iya’ng buhatan alang sa sunod tuig ang ipalit sa truck.

Posible’ng sa sunod tuig pa mapalit ang truck tungod kay aprobahan pa sa hunta probinsiyal ang budget niini.

Dugang ni Davide nga kung dunay sobra nga budget karong tuiga ang probinsiya posible’ng karong tuiga usab mapalit ang truck.