Strike wa mahinayon

CEBU, Philippines - Wa mahinayon ang laraw unta nga strike sa mga rank and file workers sa unyon sa Korean Electric Power Corporation(KEPCO) kagahapon sa hapon, human sila nakadawat og pahibalo nga gipaubos sa hurisdiksyon ni Department of Labor and Employment Secretary Rosalinda Baldoz ang ilang yangungo.

Matud pa ni Dennis Derige, tigpamaba sa Partido nang Manggagawa, padung na unta sila sa ilang strike apan gumikan sa kamandoan ni Baldoz, ila kining tumanon ug wala nila kini ihinayon.

Sumala pa ni Derige, nagpasalamat sila sa kadagkuan sa DOLE tungod kay ni- intervene kini sa maong problema ug nangita kini og mga pamaagi nga mahatagan kini og solusyon.

Nasagmuyo si Derige sa National Labor Relations Commission  tungod kay ilang napanglantawan nga wala silay makuhang hustisya sa maong buhatan.

Apan ila gihapong paningkamotan nga mokooperar sa proseso pinaagi sa pagkuha og kaugalingon nilang labor lawyers kay wala silay salig sa maong NLRC.

Panghinaut ni Derige, nga si Baldoz mismo maoy mopatunga ug dili na ang NLRC.

Si Lowell Sanchez sa iyang bahin ang presidente sa Kepco Cebu Supervisor Association, nibutyag nga nasagmuyo siya kay wala sila mahatagi og higayon nga makapadayag, apan ilang respetuhon ang proseso.

Si Teody  Navea, sa BM-Sanlakas nibutyag nga angay tahuron ang balaod sa pamuo dinhi sa Pilipinas.

Ang Department of Energy-7 daan nang mipasalig nga bisan mag-strike pa ang mga kawani sa KEPCO di kini makaapektar sa supply sa kuryente sa Sugbo tungod sa gihimo nilang pagpangandam tungod sa pagsugod kagahapon sa Asia-Pacific Economic Cooperation(APEC) Meet dinhi sa Sugbo.  (BANAT NEWS)